رافض اكون (مجنون شمس)

رافض اكون ...

غير يا حبيبتي مجنونك

رافض اكون....

دمعة يا روحي ف عيونك

رافض اكون السبب في لحظة حزن
رافض دوام الليل .. رافض قساوة الحضن

******************************

رافض اكون غير فارس الأحلام
رافض تسمعي غير بس احلى كلام

ما اقدرش اقسى عليكي ده انتي روح الروح

ده انا للقانا باعد وباحسب الأيام
********************************

يا شمس الفجر يا هاله بلون النور
أهد عشانك الدنيا ... اعدي بحــــور
أكون علشانك عنترة وقيس والمتنبي

اصول واجول واهد

واغضب واثور

*******************************

اقول فيكي كلام طالع من الدقات

ولو اسكت يبوح قلبي بكل سكات

يقول ما فيش غيرك انتي يا نني العين

ده يوم اشوف طيفك بتبقى اسعد اللحظات
**********

السعادة والرضا

السعادة والرضا
متلازمين...

وشين... لعملة واحدة
زي الملك والكتابة
والأسود والديابه

زي العيدان والورود

زي الوجود...
والمخلوقات
لما تشق الشمس

عتمة الليل الغويط

احمده....

قول له الف الف حمد
مهما حصل..

ولو سكنت الأحزان
بيوت عينيك
كل ما تسمع أذان
ردده....

ووحده...

ده العظيم
والكريم

أعبده.....

السعادة والرضا
مش بالسهل يتحققوا

قول لربك الف حمد
صلي وادعي
اظهر رضاك

المداري جوه تنيات القلب
عشان تنول منه السعادة
والاكاده
انك نايلها

حب نفسك....

حب القلوب اللي تحبك
أما القلوب اللي بتكرهك

حاول تحببها فيك...

بالحسنى...

بالكلام اللي يفرفت الصوّان
ويخليه....

حبات رمل مفرّطه

بتطير ويا الهوا

ف وقت العصاري....

ساعتها بس...

السعادة والرضا..

هاييجوا يجروا

عشان يترموا

في حضن قلبك

اللي اهتدى

مناجاه مع ناصر

اصحى يا ناصر
فوق من نومك
جه دلوقت يا ناصر يومك
شفت الأمة؟
صبحت رمّه...
لما صابتها يا ناصر الغُمّه
شوف من بعدك
ضاعت خلفك أحلام وعدك
بالحريّه
ولا عاد فيها يا ناصر أي استقلاليه
شفت الظلم؟
والعبّـاره؟
والحرامية ف الطياره؟
رايحين لندن....
شفت رغيف العيش المتر وهو صغنن؟
شفت يا ناصر

آه يابلدنا
يا داركولا وماصّه ف دم ولادنا
غصبٍ عنِّكْ
يا استعمار بيجوب أراضيكي وجايلك منِّكْ

فاض يابوخالد بينا الذل
داس من بعدك الحرامية روس الكل
آه لو تعرف...

إيه اللي حصل لبلاد النيل
كانت لما بييجي الليل
ويغطيها
يناموا ولادها بأمان فيها
شوف دلوقت
صارت فيها اللي مكفيها
ويمكن أكتر
صار حراميها بيمشي فيها وبيتمختر
وبيتكبر
ع الغلابه
صارت جحر ولامم جواه أَلْف ديابه

آه يابوخالد
صبح الساده عبيد
وصبح العبد ف بلدك سايد
إيه يا زعيمنا
مش هاتقول لنا ع اللي كاسرنا واللي هازمنا؟
فيه ايه يا ناصر؟
مالك ساكت !!!
مُـتّ يا ناصر؟
والجدعنة والنخوى اهي ماتت

أنا يا زعيمي جداً آسف
أنا طولت عليك أهه باين؟

بص يا ريس
كده م الآخر
مهما يجيلنا ولو مليون
ولووعدونا بالإصلاح
حتى قزاز شبابيك الكون

برضه هاتفضل انت يا ناصر انت الريس
برضه هاتفضل انت يا ناصر انت الريس

مساح الخير

وزي ما اتفقنا ان مساح هي دمج بين "مسا" و "صباح"

عشان اللي هايدخل بالليل واللي هايدخل بالنهار


النهارده انا نفسي اقدم اعتذار لأغلى إنسانه في الدنيا، وهي خطيبتي حبيبتي

ناس كتير بتفتكر الاعتذار ده ضعف؟؟

ولو فيه رجاله بيقروا الموضوع دلوقت طبعاً الكرامة هاتاخدهم ويردوا يقولوا لي : يووووه جاتك خيبة

أحب اعرفكم يا أمامير ان الاعتذار مش ضعف مني، ولكن من الصح لو انت فعلاً قوي انك لما تغلط تعتذر


الحكاية طويلة عريضة

مش لازم نحكيها بقى خلاص هي خلصت وخلاص.

غــــول البـــُــعْد

شَكِّلي خُطا الأحلام
فكَّريني بكُل كلام
عن الحب..
عن الحياه...
ضيعي بإيديكي آه
طيبي جراح القلب الاخضر
قلبي قبلك شاف الحزن
قلبي تاه..
قلبي قبلك داق المُر
مُرّ صَبْر...
قلبي قبلك ياما شرب من بحر غدر
ما يِنْتِهِيش
أنا كنت إيه يا حبيبتي قبلك؟
آه !!
ما فيش...
..........................
قَرَّبي خطاوي القلب
قبل ما يستقوى غُول البعد
ويِطْفِي نار الحب
أصل غول البعد كافر
مش بيعرف أي رَب
غول البعد مات ف قلبي
إقتليه بلمسة إيد
ف حلم بعيد
اقتليه بحضن دافي
اقتليه بحب صافي
اقتليه بقلب حَبْ
خضّري الجنه بورد عشقك
بابتسامة من شفايفك
بسمة حلوة تِغْنِي طِفْل
عن حنان أُمُّه
كلمة حلوة من لسانك
هاتسعده
هاتنسّيه كل همه
لِفِّي كل الكون بحُبِّكْ
داري قلبِك
م الندَّاهه
إوعي تُقَعي
ف المتاهه..
بصي ف خرايط حُبّنا
والأكيد هاتلاقي مخرج
عارف ان البعد قاتل
بس انا ف عينيكي راحل
مش لاقي لي أي سِكّه
مش لاقي لي حته أخرُج
مش لاقي
حتّى المَداخِل
لجل أخرُج من عينيكي
قدري سجن جميل منوّر
هاحسد نفسي!!
الله أكبر
من عِينَيَّهْ
قبلي قالوا
ما يحسد المال
غير صحابه
قلبي جالك فاتح بابه
مش لاقيلك المفتاح
لجل يقفل
اصل قلبي دايب فيكي
إيه هايعمل؟
غيرشي إنه يعوم ف بحور العيون
غيرشي إنه يطير يلف الكون
.....................................
إرسميني ع المخدّه
صدقيني
جربي كده النهارده
ترسميني؟
رسم إيدك رح يكسّر
حواجز بعدنا
إرسميني بس هاتلاقيني جنبك هنا
أحضنيني
كلميني
إتْجَنِّنِي
سَلِّمِي بإيديكي على إيدي
نَشِّني
هاتلاقيكي صايبه هدفك
سيبي من سكر شفايفك
ع المخده أي أثر
هاتلاقيه ظهر ف خدي
آه يا مين دلوقت قدي
سُكَّرِكْ على خدِّي ظَهَرْ
شفتي بقى يا حبيبتي
قد إيه البعد سهل
شكليه انتي بإيديكي
يا حبيبة ف أي شكل
شَكْل ضحك ف وقت فرح
شَكْل حزن ف وقت جرح
دي الحياة بإيدينا حزن
والحياة بإيدينا فرح
إبني صرح
إسمه هادي
أعلى صرح ف أحلى وادي
وادي حبي
جسم هَمْدَانْ يحَرَّكُه
نبض قلبي
بصي بقى
إتخيلي إن انتي جنبي
إيدي ماسكه إيدك
خدي لامس خدك
نفسي دلوقت لو سألتك
عن بعادنا....

أعرف ايه يا حبيبتي ردك
أعرف ايه يا حبيبتي ردك

زمن اللامسئولية

بحكم عملي في شركة علاقات عامة لمدة عام ونصف العام، فقد التقيت بكل أنواع البشر، أدباء ومفكرين، علماء ومثقفين، فنانين وراقصين. نعم، فلقد رأيت عاصي الحلاني بهدوئه وطيبته، ورأيت عمرو دياب بتكبره وعنجهيته وإطلالته التي تشعرك بأنك أمام أحد أهم رجال العالم، ورأيت نانسي عجرم بمادة السيليكون التي تختبئ تحت طبقة الجلد الخارجي لوجهها الذي تعتقدون أنه أجمل وجوه العالم، كما رأيت الصحفي الكبير سمير عطا الله، بوجهه البشوش، ورأيت السيدة مرفت فهمي، مديرة تحرير روزاليوسف، بشخصيتها البسيطة، ورأيت عادل إمام بجديته التي تتنافى تماماً مع طبيعة عمله كممثل كوميدي. ورأيت الدكتور أحمد زويل ببشرته ذات الطبيعة المصرية السمراء، ورأيت محمد سعد "الجدع" أو "ابن البلد" بخفة ظله المعهودة.

أحببت كثيراً تلك المهنة، حتى صارت في دمي، فأنا الآن على دراية تامة بكل الوسائل الإعلامية في دولة الإمارات، وعلى علاقات جيدة بالصحفيين والإعلاميين، الجيدين منهم والغير جيدين.

دخلت تلك الشركة وأنا لا أفقه شيء في أي شيء، لكنّي الآن، ولله الحمد، موظف علاقات عامة محترف. أدري كيف أتعامل مع الناس، وكيف "أثبتهم" كما نقول بالعامية المصرية، وكيف أجعل شخصاً يأتي نحوي حاملاً مسدس مدجج بالطلقات الحية يعدلُ عن تفكيره في قتلي. تعلمت أيضاً كيفية كتابة وترجمة الأخبار الصحفية، وكيف أكتب مقالاً مثل هذا المقال الذي تقرأونه.

تحولت شخصيتي تحولاً تاماً في الفترة الأخيرة، من الصبي المدلل "اصغر اخواته" إلى ذلك الاختصاصي المحترف في مجال الإعلام والعلاقات العامة. ولا أكذب عليكم، فقد أحببت ذلك التحول الذي طرأ على شخصيتي مؤخراً حباً جما. لكني، ورغم ذلك الحب، أحن في بعض الأوقات إلى العهد القديم، أيام كنت أطلب فيها المصروف اليومي من أبي، وأطلب وجبة "محشي الكرنب" التي أحبها من أمي، وعندما أفلس، أطلب مزيداً من النقود من أخي هاني، وفي حال رفضه، أطلب النقود من والدتي بحجة وجود ذلك الثقب في جيب البنطلون الذي ضاع من خلاله المصروف.

حقاً، من منا لا يتمنى العودة إلى زمن اللامسئولية ؟؟؟

كبش الفداء

بعد قراءتي لخبر وفاة العبقري والمخرج المخضرم يوسف شاهين، حزنت حزناً شديداً. لكني ما لبثت إلا أن أطلقت ضحكةً هيستيرية عندما قرأت خبراً آخراً في الصحيفة ذاتها. الخبر بعنوان "غضب مصري لتبرئة مالك العبارة السلام 98". قرأت الخبر وكأن أحدهم يطعنني بخنجره المسموم في صدري طعنات متتابعة. فأول شيء قلته بالعامية المصرية "يانهار أسود ومنيل". فكيف يصل بنا الحال لهذه الدرجة؟!

صراحةً.. تعجبت كثيراً لما قرأت، فقد برأت المحكمة خمسة من أصل ستة متهمين في قضية العبارة "السلام98"، من ضمنهم السيد المحترم ممدوح اسماعيل، عضو مجلس الشورى ورئيس شركة السلام التي تملك العبارة.

وكان "كبش الفداء" هو السيد صلاح الدين جمعة، ربان باخرة "سانت كاترين"، والذي عوقب بالسجن لمدة 6 أشهر ودفع غرامة مالية كبيرة جداً وقدرها 10 آلاف جنيه بتهمة عدم مساعدة "السلام 98". واعتبرت المحكمة الموقرة أن تصرف السيد "كبش الفداء" قد غابت عنه الرحمة، وقد تقاعس في تقديم المساعدة إلى السفينة التي كانت ترسل نداءات استغاثة.

أي عدلٍ هذا؟؟

أنعاقب من لم يساعد ونبرئُ السبب في الغرق؟!

أي قانون من القوانين الدولية ينص على أن نبرئ القاتل وندين من لم يساعد القتيل في الذهاب إلى المستشفى؟!

وقد توجه السيد ممدوح اسماعيل بعد غرق العبارة إلى لندن مباشرةً ليمكث هناك بصحبة إبنه. فلماذا توجهوا إلى لندن إذا لم يكونوا متهمين؟!
وهل يهرب شخص من موقع جريمة إلا إذا كانت يداه ملطختين بالدماء؟

لقد توقعت ذلك الحكم منذ فترة طويلة، فكل الظروف والملابسات التي حدثت كانت تشير إلى تبرئة المتهمين. حوار أجراه منذ فترة السيد المحترم "المحاور" مفيد فوزي مع السيد المحترم ممدوح اسماعيل، والذي كان حواراً للتبرئة أكثر منه وصولاً للحقيقة، وما كان ينقص ذلك الحوار إلا أن يبدأ السيد مفيد فوزي بغناء أغنية "آدي الملاك البريء أبو قلب طيب أوي" في حق السيد ممدوح اسماعيل. بالإضافة إلى نقل المحكمة إلى الغردقة بمحافظة البحر الأحمر، حيث رفضت السلطات المصرية نقل المحاكمة إلى مدينة القاهرة حتى لا تمنح المحامين الفرصة الكاملة للحضور بشكل مستمر. كمان نجحت السُلُطات في عزل المحاكمة عن وسائل الإعلام التي لم تستطع متابعة القضية حيث تبعد الغردقة عن القاهرة حوالي 400 كيلومتر.

واسمحولي بأن "أفش غلّي" وأقول لقد انتشرت مظاهر "الكوسة" في بلدنا الحبيب، لدرجة وصلت إلى الاستهتار بحقوق الناس وقتل الأبرياء بدون سبب، وعدم معاقبة الجناه.

اليوم سأتصل بأبي في مصر، ليقتل جارنا الذي تشاجرنا معه منذ سنتين بسبب ماسورة الصرف الصحي الخاصة بنا والتي كانت تسرب بعض "السماد الحيوي" إلى أرضِه. تُرى هل سيبرئون أبي من تهمة القتل تلك ؟؟
أعتقد أن هيئة المحكمة الموقرة لن تبرئ أبي وسوف تدينه بالقتل عمداً مع سبق الإصرار والترصد، وسوف تكون حيثيات الحكم كالتالي:
1- المتهم ليس عضواً في مجلش الشورى
2- المتهم ليس غني أو "واصل"، مما يعني أنه لا يوجد "كبش فداء"

فهنيئاً لكل من وجد "كبش فداء" في مصرنا الحبيبة.......

عملت مدونه

مساح الخير ع الجميع

أنا مش عارف الوقت اللي انتوا هاتدخلوا فيه المدونه هايكون بالليل ولا الصبح، عشان كده اطلقت كلمة "مساح"، ألا وهي عبارة عن Combination أو دمج بين الصباح والمساء.

دي أول حاجه أكتبها في المدونة

قلت بدال ما كل حاجتي بتتبهدل وبتتشرد كل ورقة ف ناحية أعمل لي مدونة أحط فيها كل حاجه

بارحب بيكم في مدونتي ويا ريت تكرروا الزيارة كتييييييييير أوي

هاتلاقوها مختلفة ودمها خفيف.

تحياتي

الأدباتي